Ш. Цэрэнсамбуу: “ТӨРӨХ ҮЕИЙН ӨВДӨЛТ НАМДААЛТ БА ӨВДӨЛТГҮЙ ТӨРӨХ ТУХАЙ”

Ш. Цэрэнсамбуу: “ТӨРӨХ ҮЕИЙН ӨВДӨЛТ НАМДААЛТ БА ӨВДӨЛТГҮЙ ТӨРӨХ ТУХАЙ”

Бусдад түгээгээрэй

Нийслэлийн Өргөө амаржих газрын Эх барих эмэгтэйчүүдийн эмч, Анагаах ухааны доктор, Клиникийн профессор, Зөвлөх зэргийн эмч Ш.Цэрэнсамбуу зөвлөж байна.

Төрөх үед өвдөлт намдаадаг ямар аргууд байдаг вэ?

Төрөх үед олон янзын өвчин намдаах аргууд байдгаас сүүлийн үед хамгийн түгээмэл хэрэглэгдэж байгаа мэдээ алдуулалт өвдөлт намдаах хэлбэр бол эпидураль мэдээ алдуулалт юм.

Энэ нь нугасны хатуу хальсны гаднах хөндийд гуурс тавьж мэдээгүйжүүлэх эмийн бодисыг тодорхой тунгаар тодорхой хугацаагаар хийж төрөх үеийн өвдөлтийг намдаах хэлбэр юм.

Энэ аргыг Дэлхийн дахинд хэрэглэж байгаа юу? Хэзээнээс эхэлж хэрэглэж эхэлсэн вэ?

Энэ аргыг хэрэглэж өвдөлтгүй төрөх байдал улс орон бүр харилцан адилгүй бөгөөд АНУ, Франц зэрэг улсад нийт төрөлтийн 70 хувь нь дээрхи аргаар төрөх үедээ өвдөлт намдаалт хийлгэдэг бол Ватиканд төрөлтийн үеийн өвдөлт намдаах ганц арга, Голланд, Швед зэрэг улсад харьцангуй бага хувьтай хэрэглэдэг байна.

Хамгийн анх 1853 онд Английн эмч John Snow Виктория хатан хааныг төрөхөд нь төрөх үеийн өвдөлт намдаалт хэрэглэж байсан нь түүхэнд мэргэжлийн анестезиолог эмч хийсэн анхны тохиолдол болон бүртгэгджээ.

Төрөх үеийн өвдөлт намдаах энэхүү аргыг МАНАЙ УЛСАД 2000 оноос нэлээд түгээмэл хэрэглэх болсон ба манай амаржих газар нэвтрээд даруй 20 жил болжээ.

Тэгвэл төрөх үеийн өвдөлт гэж юу вэ?

Төрөх үеийн өвдөлт бол хамгийн гол нь умайн базлалт, умайн хүзүү нээгдэх, умайн холбох, бэхлэх бүтцийн суналтын үйл явцын үед үүсдэг бөгөөд төрлөгийн 2-р үед буюу умайн хүзүү бүрэн нээгдсэн ураг төрөх явцад аарцгын булчин болон бүтцийн хэсгүүдийн суналт дарагдалттай холбоотойгоор ууц ахар сүүлний мэдрэлээр дамжин үүсч буй өвдөлтийн импульс юм.

Өвдөлт намдаах тариа хийж буй байдал

Энэ аргыг хэрхэн, яаж ашиглах вэ? Ямар давуу талтай вэ?

Энэ арга нь эпидураль хөндийд хийсэн бага концентрацитай хэсэг газрын мэдээгүйжүүлэх эмийн бодис нь умайгаас мэдрэлийн салаагаар дамжин нугасанд очих өвдөлтийн импульсыг блок болгох нөхцөл дээр үндэслэгджээ. Мэдээгүйжүүлэх бодис маань тодорхой хугацааны дараа гадагшилдаг.

Ихэвчлэн умайн хүзүү 4 см-ээс дээш нээгдсэн үед тодорхой тун хугацаатайгаар эмийн бодисоо нэмээд төрлөгийн нэгдүгээр үеийн төгсгөлд 8-9 см нээгдсэн үед бага зэрэг завсарлаад эх дүлж умайн базлалт эхийн дүлэх хүчээр төрлөг явагдсны дараа ямар нэгэн нэмэлт ажилбар хийх үед дахин өвдөлт намдааж болдог давуу талтай ажилбар юм.

Энэ аргыг ямар заалтаар хэрэглэх вэ?

Гол төлөв төрөх ээжүүдийн хүсэлтээр бусад мэдээгүйжүүлэх арга үр дүнгүй үед, базлалт, төрөлтийн өвдөлтийг хэт мэдэрч байгаа, төрөх үйл ажилгааны гажуудал илэрсэн, артерийн даралт өндөртэй төрөгч эхчүүд болон хожуу хордлоготой үед хэрэглэхэд зохистой ажилбар юм!

Энэ аргыг хэрэглэхгүй байх ямар эсрэг заалтууд байдаг вэ?

Төрөхөөс өмнөх үеийн цус алдалт, цус бүлэгнэлтийн хямрал, цус бүлэгнүүлэгч эс тромбоцитын цөөрөл, мэдээ алдуулах хэсэг газрын үрэвсэлт идээт эмгэг, тархины дотоод даралтыг нэмэгдүүлсэн тархины доторхи эзэлхүүнт эмгэгүүдийн үед эсрэг заалттай ба тодорхой шалтгаанаар нуруу нугасны топографи алдагдсан эмгэгүүд, урд нь нуруунд хийгдэж байсан мэс засал, төв мэдрэлийн системийн зарим өвчнүүд ( миастени, мэдрэлийн судлын тархмал хатуурал, эпилепси, булчингийн хатингаршил) зэрэг эмгэгийн үед харьцангуй эсрэг заалттай ажилбар юм. Гарч болох хүндрэл бол зүү хатгагдсан нугасны хатуу хальсны хэсгээр тархи нугасны шингэн гадагшилсан үед толгой өвдөх хүндрэл илэрч болно.

Эх бэлтгэсэн: Pentadice


Бусдад түгээгээрэй
Анагаах ухаан Зөвлөгөө